ഇന്ത്യയില്‍ പുതിയ പദ്ധതിയുമായി ഗൂഗിള്‍….
ആഗോള ടെക് ഭീമനായ ഗൂഗിള്‍ ഇന്ത്യയില്‍ സ്വന്തമായി പുതിയ ഡേറ്റ സെന്റര്‍ ഒരുക്കുന്നതിനു പദ്ധതിയുമായി എത്തിയിരിക്കുകയാണ്. എന്നാൽ ഇതിനായുള്ള സ്ഥലം കണ്ടെത്താനുള്ള നടപടികള്‍ പുരോഗമിക്കുകയാണ്. നവിമുംബൈയിലെ ജൂയിനഗറില്‍ ഡേറ്റ സെന്ററിനായുള്ള കെട്ടിടം നിര്‍മിക്കുന്നതിന് 22.5 ഏക്കര്‍ സ്ഥലം ഏറ്റെടുക്കുന്നതിനുള്ള ചര്‍ച്ചകള്‍ അന്തിമഘട്ടത്തിലാണെന്നാണ് വിവരം.നിലവില്‍ വാടകയ്ക്കെടുത്താണ് ഗൂഗിളിന്റെ ഡേറ്റ സെന്ററുകള്‍ പ്രവര്‍ത്തിക്കുന്നത്. നവി മുംബൈയിലും നോയിഡയിലും ഗൂഗിളിന് പാട്ടത്തിനെടുത്ത ഡാറ്റാ സെന്ററുകളുണ്ട്. 2022-ല്‍ നോയിഡയില്‍ അദാനിയുടെ ഒരു ഡാറ്റാ സെന്റര്‍ ഗൂഗിള്‍ വാടകയ്ക്കെടുത്തതായി റിപ്പോര്‍ട്ടുകളുണ്ട്.
മഹാരാഷ്ട്ര വ്യവസായ വികസന കോര്‍പ്പറേഷന്റെ ഉടമസ്ഥതയിലുള്ള സ്ഥലം പാട്ടത്തിനെടുത്തായിരിക്കും ഡേറ്റ സെന്റര്‍ ഒരുക്കുക. നിലവിൽ കണ്ടെത്തിയിട്ടുള്ള സ്ഥലം മുംബൈയിലെ ഹെര്‍ഡിലിയ കെമിക്കല്‍സ് എന്ന രാസകമ്പനിക്ക് എം.ഐ. ഡി.സി. പാട്ടത്തിനു നല്‍കിയതാണ്. ഇപ്പോഴിത് പുണെ ആസ്ഥാനമായി പ്രവര്‍ത്തിക്കുന്ന ഗ്രാമേഴ്സി ട്രേഡ് ഇന്‍ഡസ്ട്രീസിന്റെ കൈവശമാണുള്ളത്. ഈ സ്ഥലം ഗൂഗിളിനു കൈമാറാനായി ചര്‍ച്ചകള്‍ അന്തിമഘട്ടത്തിലാണെന്നും ഉടന്‍ ധാരണയിലെത്തുമെന്നുമാണ് സൂചന.
